Tilbyr gratis WiFi i sentrum
Laurdag opna to WiFi-soner i Sandane sentrum. Ved Heradsplassen og Grandeparken kan ein no nyte gratis internett-tilkopling.
– No håpar vi at ungdommen møtast i sentrum, i staden for å chatte frå rommet sitt, seier rådgjevar i Gloppen kommune, Birte Fossheim.
Først i fylket
Gloppen kommune er ein av tre kommunar i fylket som har fått støtte frå EU til gratis WiFi-soner.
– Vi fekk 150.000 kroner frå EU til WiFi-soner i kommunen. Med desse pengane får vi også laga slike soner i Colombusparken i Hyen, ved Coop på Byrkjelo og i sentrumsparken på Reed. Dette er stadar med mykje folk og turistar. Desse opnar innan september 2019, seier Birte Fossheim.
Gloppen kommune, saman med kommunane Årdal og Førde, er dei første i fylket som opnar slike WiFi-soner.
– Vi søkte om midlar til internettsoner, då dette var noko ungdommen i kommunen ønskte. Fleire andre stadar i Noreg har fått gratis WiFi i sentrum, så då ville vi òg søke om det. Det var førstemann til mølla, og vi var tidleg nok ute til å få tildelt midlar frå EU, fortel Fossheim.
Spesiallaga benkar
Fossheim kan fortelje at kommunen håpar å få laga spesielle benkar til internettsona i Sandane sentrum.
– Vi håpar at ungdommen vil møtast fysisk. Framover har vi planar om å lage nokre benkar med solcelletak i samband med WiFi-sona. Då kan ein lade telefonen samtidig som ein er tilkopla internett. Vi håpar ungdommen forstår at vi har lyst dei skal møtast i sentrum, seier ho.
Samarbeider med Enivest
Kommunen har eit samarbeid med Enivest, som leverer WiFi til sonene, for å ha kontroll på at internettet blir brukt på rett måte.
– Enivest hjelper oss med overvaking. På den måten kan vi unngå at WiFi-sona blir misbrukt, fortel Fossheim.
Ho legg til at kapasiteten på internettet er bra.
– Kapasiteten på internettet er god. Dette er noko EU sette krav om.