Teita bru er stengd

Teita bru på Byrkjelo vart fredag stengd for all trafikk. Eitt av brufundamenta i elva er påført store skadar etter dei siste flaumane.

Det er Statens vegvesen som har ansvaret for å drifte vegane som Sogn og Fjordane fylkeskommune eig.

– Behov for tiltak

– Eg har ikkje vore og sett på Teita bru sjølv, men vi har bede entreprenøren som driftar denne vegen om å sjå på brua. Mesta har vore og sett på ho, og dei har valt å stengje ho. Det er behov for tiltak, seier kontrollingeniør i Statens vegvesen, Skule Jacobsen.

Brua er stengd for all trafikk. Korkje gåande, syklande eller bilistar får høve til å bruke ho.

– Kva konsekvensar får dette for dei som bur i området?

– Det er to bruer lenger nede i bygda som dei kan bruke. Det er ei bru like ved Norsk Fjordhestgard og ei bru på Råd. Desse bruene kan nyttast, fortel han.