Tar vare på dei gode smakane frå oppveksten

Til jul blir ønsket om det kjende og kjære ekstra sterkt, og mange vender seg mot tradisjonsbaksten. Det behovet er Jølster Bakst klar til å møte.

I eit lite, brunt hus på garden Søgnesand i Kjøsnesfjorden i Jølster, står to damer og byggjer musklar.

Sunnfjordlefsa

Langs ein lang og smal benk går armane att og fram, i kjappe, rutinerte rørsler, medan dei forsiktig og omtenksamt snur på lefsa på benken.

For det er ikkje vekter og yogastrikk som står for kroppsbygginga her. Med eit handlaga kjevle av bjørketre, bakar Hilde Søgnesand og Anne Grete Førde ut kaffilefsa til akkurat riktig diameter.

Så blir ho raskt rulla opp på ein bakstepinne og får seg ein flyktig tur 180 grader rundt, før ho møter sin skjebne på steiketakka som står og freser av forventing. Høg temperatur må til for å få dei rette prikkane.

Tradisjonsoppskrift

På ein novemberdag som denne gir dei to takkene ein behageleg varme inne i bakeriet. For ute bles det, og geitene i fjøsen til Hilde har bestemt seg for at det er nok berre å stikke nasen litt ut av døra. Dei ser opp på Søgnesandsnipa og prisar seg lukkeleg over at dei har ein varm og god fjøs å rygge tilbake i.

– Midt på sommaren er det litt annleis, då merkar vi varmen godt. Særleg på dei dagane vi bakar flatbrød, smiler Hilde.

Ho har baka tradisjonsbakst i over 17 år. Dei første fem hos Berits Hellebakst på Ålhus.

– Då Berit ville legge ned drifta, bestemte eg meg for å satse på eiga hand, og fekk lov til å ta med meg nokre av oppskriftene hennar.

To kokkar

Hilde er utdanna kokk, og tok kontakt med Anne Grete Førde som ho kjende frå kokkeskulen, og høyrde om ho ville vere med og starte bakeri.

Anne Grete hadde jobba som kokk både i hovudstaden og i USA, men hadde nyleg flytta heim igjen til Førde i Jølster for å ta over garden der. Ho sa raskt ja.

I 2010 flytta dei to arbeidsplassen inn i det vesle huset i tunet der Hilde voks opp.

Stor produksjon

I dag, tolv år seinare, er det framleis dei to. I tillegg til den nemnde kaffilefsa, blir det produsert både lefsebrød, flatbrød, natronkaker og klappekaker i det vesle bakeriet. I desember får dei i tillegg hjelp frå tanta til Hilde med å lage smultringar.

– Vi leverer varene våre til åtte butikkar, tre bakeriutsal, fire hotell og ei cateringbedrift. Den største kunden vår er Bakar-Jon på Byrkjelo, seier Hilde, og fortel at ei og anna forsending òg går til daglegvarebutikken i Vadheim.

Året rundt er det fleire privatpersonar som bestiller jamt og trutt, eller tar seg ein tur innom bakeriet.

– No når det nærmar seg jul, er det mange som tar kontakt og vil ha lefse til seg sjølv, eller som gåve til familie og vener.

Frå slutten av oktober og fram til jul er det travle tider i bakeriet, og særleg lefsebrødet til Jølster Bakst er populært. Dette er til sals heile året, men til jul aukar etterspurnaden betrakteleg.

– Det går i grunn mykje av alt, men lefsebrødet er populært til fisk og pinnekjøt, og det er ikkje få leivar vi kjevlar ut før jul, seier Anne Grete.

Ta vare på tradisjonane

Når kalenderen endeleg viser 22. desember, går dei to damene av vakt og lar julefreden senke seg.

– Ja, då er vi klare for å legge ned kjevlet, i alle fall for ei lita stund, smiler dei, og legg ikkje skjul på at det til tider er litt vel hektisk.

Men lysta til å ta vare på tradisjonane som dei har så kjær, gjer at dei plukkar opp igjen kjevlet på nyåret.

– Det er fint å kunne byggje vidare på tradisjonen vi har fått med oss, og ta vare på både dei gode smakane frå oppveksten, men òg den gode trygge maten, utan tilsetjingsstoff, som ofte tradisjonsbakst er, seier Hilde.

Drivkraft

Identitet og tradisjon er gjerne to stykke av same kake. Det å kjenne seg igjen i noko så handfast som god mat, blir stadig viktigare.

– Både gjennom reise og media får vi den store verda så tett inn på oss, at det nære kan vere med på å forsterke vår eigen identitet, seier Anne Grete.

Og om dei blir leie?

– Ja, av og til kan vi kjenne på at det blir litt mykje rutine. Men det er så kjekt at folk vil ha produkta våre. Då er det viktig at vi gjer ein god og nøye jobb, kvar dag og kvar lefse. Det er det som har drive oss dei siste tolv åra, og det er det som framleis gjer at vi plukkar opp igjen kjevlet, igjen og igjen, understrekar dei.