Julepølsa, den eigentlege stjerna på tallerkenen?
– For oss kokkar er pølse den beste maten.
Orda kjem frå kjøkensjef på Gloppen hotell på Sandane, Bodil Fjellestad Eikrem.
Ho handterer pølsemaskina med sikker hand, slik ho har gjort det sidan 2008, i det vesle, oransje huset bak Gloppen hotell. Her ligg produksjonskjøkenet til Fjordameny.
Artikkelen held fram under annonsen.
Mykje på menyen
Stikk du hovudet inn her, kan du risikere å støyte på ein heil hjort som skal delast opp til steiker, filetar og andre godsaker som finn vegen fram til gjesten sin tallerken i stovene på hotellet.
Ein annan dag kan ein finne store mengder med laksesider som lakselordane anno 2022 har fått på kroken. Desse skal røykast og sendast i posten til den stolte fiskaren. Eit godt eksempel på det ein kallar ekstraservice, og som fint illustrerer lista Gloppen hotell har lagt for seg sjølv i forholdet til gjestane sine.
Reine smakar
Men i dag er det pølser som gjeld, nærare bestemt jule- og spekepølse.
– Vi har mykje godt i pølsene våre. Hovudsakleg er det hjortekjøt, storfe og svin. Pølsene er av heilt reint kjøt, og er ikkje tilsett noko kraft eller veske, seier ho og forklarar at pølsemaskina går på vasstrykk og at det difor blir tilført litt væske på den måten.
Julepølsa blir å finne på juleborda som startar i slutten av november, slik ho har vore fast sidan 2008.
Kortreist pølse
Kjøkensjefen innrømmer at det er kjekt å kunne lage eigne pølser. I tillegg til julepølsa lagar dei òg spekepølse eller hjortemør som dei kallar det.
– Så lenge vi har råstoff, maskin og lokale til å lage dei, er det supert å kunne by gjestane våre på kortreist pølse.
Oppskrifta har ikkje endra seg merkbart sidan oppstarten, med unntak av mengda av lam.
Artikkelen held fram under annonsen.
– No får eg ikkje inn så mykje lammekjøt, og blandar difor i litt meir hjortekjøt enn tidlegare, fortel ho.
Favoritten
Hotellet konsumerer mesteparten av produksjonen sjølve, men det er òg mogleg å kjøpe Fjordameny-pølsene i resepsjonen på Sandane.
Når kjøkensjefen sjølv skal velje middag, blir det gjerne pølse.
– For oss kokkar er det den beste maten, ler ho.
– Det blir jubel på kjøkenet når eg serverer pølse til personalmaten.