Polsk mann sikta for menneskehandel
Ein polsk mann i 40-åra er arrestert og sikta for menneskehandel. Mellom 30 og 40 bærplukkarar i Sogn og Fjordane kan ha vorte utnytta, ifølgje politiet.
Det stadfestar politiadvokat Bernt Dahlsveen i Vest politidistrikt til Bergens Tidende.
Mannen vart arrestert måndag ettermiddag i samband med eit tilsyn gjennomført av Arbeidstilsynet, ifølgje VG.
Polakken skal avhøyrast tysdag.
– Vi har òg planlagt fleire avhøyr med polske sesongarbeidarar gjennom dagen, seier Dahlsveen.
Tilsynet undersøkte arbeidsforholda for utanlandske bærplukkarar, ifølgje Bergens Tidende.
Mannen er sikta for å ha utnytta personar til arbeid gjennom eit bemanningsbyrå som formidlar sesongarbeidarar frå Polen til Noreg.
– Det er mistanke om at arbeidarane har så dårleg lønn og så lang arbeidstid og dårleg innkvartering, at det blir ramma av reglane i menneskehandelslovgivinga, seier Dahlsveen. (©NPK)