Widerøe har seks fly ute av drift – fleire kanselleringar
Den pågåande flyteknikarstreiken fører til at Widerøe fredag har seks fly ute av drift. Selskapet har fredag 23 kanselleringar.
– Som følgje av både større og mindre tekniske feil er seks Widerøe-fly ute av drift, seier pressesjef Catarina Solli i Widerøe til Dagbladet.
Ho seier at dei som følgje av flyteknikarstreiken ikkje har ressursar til å få reparert feila, og at det er årsaka til å flya står stille.
Artikkelen held fram under annonsen.
Ifølgje avisa har selskapet 23 kansellerte flygingar fredag.
Fredag morgon hadde verken SAS eller Norwegian kansellerte avgangar, men situasjonen kan endre seg utover dagen.
Flyselskapa har denne veka opplyst at passasjerar som ikkje har fått beskjed om at flyet deira er kansellert, kan møte opp som normalt.
Streiken blant flyteknikarane er inne i sjuande dag. 106 teknikarar er så langt tekne ut, og streiken vil etter planen bli trappa opp i helga med 39 flyteknikarar til. I tillegg har NHO varsla lockout frå søndag, noko som inneber at 450 flyteknikarar frå NFO blir nekta å komme på jobb – inkludert ambulanseflytenesta i nord.
NHO Luftfart og Norsk Flytekniker Organisasjon (NFO) tok opp igjen samtalane hos Riksmeklaren fredag klokka 10. (©NPK)
