Nortura vil oppgradere slakteri for opptil 1,4 milliard kroner
Nortura planlegg milliardinvesteringar for å oppgradere slakteri i Rogaland og Tønsberg, samtidig som dei vurderer å leggje ned anlegga på Gol og Sandeid.
Investeringane på mellom 1,1 og 1,4 milliard kroner fram til 2025 vil auke grada av automasjon og digitale prosessar i dei regionale fabrikkane til Nortura, opplyser selskapet i ein pressemelding.
Konsernsjef Anne Marit Panengstuen omtalar det som den største og mest offensive satsinga i Nortura nokosinne.
Artikkelen held fram under annonsen.
Nortura meiner at satsinga vil auke lønnsemda til konsernet med 300–400 millionar kroner i året.
Mellom anna skal eit nytt slakteri til 600 millionar bli bygt på Kviamarka i Rogaland, medan slakteriet i Tønsberg skal oppgraderast for rundt 700 millionar. Det blir òg planlagt investeringar på Rudshøgda, Malvik og Hærland.
Dei neste fire åra vil Nortura samtidig vurdere om anlegga på Gol i Viken og Sandeid i Vindafjord i Rogaland trengst.
– Eg forstår planen kan skape uro blant tilsette, men omlegginga er nødvendig for å sikre framtidige arbeidsplassar i Nortura, seier Pangenstuen.
Konsernet anslår sjølv at omlegginga vil gjelde mellom 200 og 300 tilsette.
– Eg kan forsikre at vi vil samarbeide nær med kvar og ein som blir sett i omstilling, seier ho.
(©NPK)