Noreg har like god tilgang på koronavaksinar som våre skandinaviske naboland, sa helse- og omsorgsminister Bent Høie på pressekonferansen om koronasituasjonen og julefeiringa onsdag. Foto: Jil Yngland/NTB.

Høie: Vi har like god tilgang på vaksinar som Sverige og Danmark

Helseminister Bent Høie (H) seier Noreg vil ha tilgang på fleire koronavaksinar enn vi treng, såframt alle avtalane Noreg er del av, slår inn.

På ein pressekonferanse onsdag fekk Høie spørsmål i samband med at Storbritannia same dag godkjende ein koronavaksine til bruk. Landet planlegg å byrje vaksinasjon allereie neste veke, medan EUs legemiddelverk først planlegg å godkjenne Pfizer-vaksinen 29. desember.

I tillegg fekk han spørsmål om Noreg har like god tilgang på vaksinar som nabolanda. Sverige har uttalt at dei har tilgang på 15 millionar vaksinedosar når dei blir tilgjengelege, medan Danmark meiner dei har tilgang på dosar tilsvarande fleire gonger det dei treng.

Artikkelen held fram under annonsen.

– Vi er ein del av dei same felles europeiske avtalane, sa Høie.

Dersom alle dei avtalane slår inn, har Noreg like god vaksinedekning som Sverige og Danmark, ifølgje helseministeren.

(©NPK)