– Stortinget er klar på at dersom det finst feil eller manglar i konsesjonen, så skal prosjektet stoppast, seier Ole André Myhrvold (Sp). Eit fleirtal på stortinget foreslår no ny gjennomgang av omstridde vindkraftkonsesjonar. Foto: Emilie Kirkeby-Garstad.

Fleirtal på Stortinget vil opne for gjennomgang og stans av omstridde vindprosjekt

Seks parti på Stortinget vil opne for ny gjennomgang av nokre av dei mest kontroversielle vindkraftprosjekta, og stanse prosjektet dersom dei finn saksbehandlingsfeil. Dei ber regjeringa vurdere om behandlinga av gitte vindkraftkonsesjonar har følgt energilovgivinga og kravet i forvaltningslova.

– Stortinget er klar på at dersom det finst feil eller manglar i konsesjonen, så skal prosjektet stoppast, seier Ole André Myhrvold (Sp) til NPK.

Regjeringspartia på Stortinget – Høgre, Venstre og KrF – ber saman med Senterpartiet, Framstegspartiet og Arbeidarpartiet regjeringa vurdere om behandlinga av konsesjonane er gjort i samsvar med energilova og krava i forvaltningslova, i eit såkalla omforeint forslag til regjeringa. NRK skreiv om saka først.

Artikkelen held fram under annonsen.

Forslaget er eit generelt forslag, og ingen konkrete vindkraftprosjekt er nemnt.

– Det må regjeringa vurdere. Men eg ventar nok at dei tar ei brei gjennomgang av prosjekt som er i startfasen, seier Myhrvold.

Vil setje nye konsesjonar på hald

I forslaget ber fleirtalet òg om at det ikkje blir gitt nye konsesjonar fram til Stortinget har behandla endringane i konsesjonssystemet, som regjeringa legg fram forslag til fredag. Dei ber òg regjeringa innanfor gjeldande reglar ikkje gi forlengd konsesjon for iverksetjing av vindkraftverk på land.

– Har ikkje vindkraftverka fysisk straum innan 31.12, så vil det ikkje bli gitt ytterlegare utsetjing, seier Myhrvold.

Det kan vere alt, til dømes naturverdiar eller at prosjektet har endra form etter at konsesjonen er gitt.

– Det kan vere det, seier Myhrvold.

---

Dette er forslaga frå stortinget:

1. Stortinget ber regjeringa vurdere om behandlinga av gitte vindkraftkonsesjonar har følgt energilovgivinga og kravet i forvaltningslova. Dersom det skulle finnast feil eller manglar i konsesjonen som er i strid med kravet til lovgivinga skal forvaltninga stanse vedtaket.

Artikkelen held fram under annonsen.

2. Stortinget ber regjeringa innanfor gjeldande regelverk ikkje forlenge frist for å setje i drift utover 31.12.2021 for vindkraftverk på land som i dag har gyldig konsesjon.

3. Stortinget ber regjeringa avstå frå å ta nye konsesjonssøknader for vindkraft til behandling før Stortinget har behandla stortingsmeldinga om endringar i konsesjonsbehandlinga for vindkraft på land.

(©NPK)

Ei 70 meter lang venge på veg opp til Guleslettene vindpark like ved Florø. Totalt skal 47 vindmøller setjast opp i dette området. Kvart tårn er 90 meter høgt. Foto: Tore Meek/NTB scanpix/NPK.