Færre bilinnbrot i år

I dei tre første kvartala i år vart det meldt inn 3856 bilinnbrot til forsikringsselskapa. Det er ein nedgang på 10 prosent frå i fjor.

Tala er henta frå bransjeorganisasjonen Finans Norge.

– Nedgangen på heile 10 prosent er gledeleg, men ikkje heilt uventa, seier informasjonssjef Sigmund Clementz i forsikringsselskapet If i ei pressemelding.

Han ser særleg to grunnar til dette, ein av dei er at mobile vinningskriminelle frå utlandet har fått vanskelegare arbeidsforhold med strengare grensekontroll. Bilar og personar blir i større grad sjekka under koronasituasjonen. Den andre grunnen er at få har besøkt Göteborg i sommarferien i år. Ved parkeringsområda og p-husa rundt fornøyelsesparken Liseberg er det normalt mange bilinnbrot. Men på grunn av koronasituasjonen har den halde stengt.

(©NPK)