Mange reiste til og frå Anda i juni
Talet passasjerar som var innom Avinor sine lufthamner i juni auka med éin prosent på landsbasis samanlikna med same periode i fjor. Sandane lufthamn hadde endå betre resultat.
Av dei fire lufthamnene i fylket hadde Sandane lufthamn størst auke i juni, medan Sogndal lufthamn hadde størst nedgang.
Mange reisande
I juni i fjor reiste 2952 personar til eller frå Sandane lufthamn Anda. Denne sommaren ville endå fleire anten til eller frå Gloppen via fly, og talet flyreisande auka til 3172. Dette utgjer ein auke på 7,45 prosent.
Positivt resultatet ser ein også på Florø lufthamn. Der var talet reisande 8346 i juni 2018. Mot 8826 i år, gav dette ein auke på 5,75 prosent. Sjølv om resultata var gode på Sandane og i Florø, var ikkje like mange innom flyplassane i Førde og Sogndal i den sjette månaden i år som i fjor.
Førde lufthamn hadde ein nedgang på 3,21 prosent, med 6689 reisande i år og 6911 i fjor. Nedgangen var endå større på Sogndal lufthamn, med 3,97 prosent. 4529 reiste til eller frå Sogn med fly i 2018, og 4349 i år. Næraste lufthamn i nabofylket, Ørsta Volda lufthamn, har halde seg mest stabil. Flyplassen hadde 9246 reisande i juni i fjor og 9234 i år, noko som gav ein nedgang på berre 0,13 prosent.
Tala er henta frå Avinor sin trafikkstatistikk, og gjeld komne og reisande på innanlandsflygingar, ekskludert transfer.
Millionar i lufta
- juni i år var den travlaste reisedagen nokon gong for både Oslo lufthamn og Trondheim lufthamn.
I løpet av dei seks første månadene av 2019 reiste 26,3 millionar til og frå Avinor sine lufthamner. Likevel var oppgangen berre på éin prosent på landsbasis. Den låge veksten skuldast at drifta av Haugesund lufthamn er sett ut, og at Haugesund ikkje lenger tel med i Avinor sine trafikktal.
Korrigert for utskiljinga av Haugesund hadde Avinor ein passasjervekst på 2,2 prosent i juni. Av dei 44 lufthamnene Avinor har ansvar for, hadde Bergen lufthamn størst auke. Der var veksten på 5,2 prosent samanlikna med juni 2018.
