Klimaprosjekt med midlar frå fylkeskommunen
Klimakonferanse, vassdragtreff, kartlegging av vernskog og granulatfri kunstgrasbane er blant klima- og miljøtiltaka som har fått støtte i 2018. Første søknadsfrist i 2019 er 15. januar.
I fylkesutvalet i juni 2018 vart tilskotsordninga for klima- og miljøtiltak styrka med 2 millionar kroner, noko som betydde at fylkeskommunen kunne støtte fleire og større klima- og miljøprosjekt enn tidlegare. Sidan juni har det vore to søknadsfristar, og alle midlane er brukte opp.
Tilskotsmidlane vert delt ut til prosjekt og tiltak som bidreg til ei klimaomstilling i Sogn og Fjordane. Sjå alle tiltaka som har fått støtte nedst i saka.
Mange gode prosjekt
– Auka rammer for tilskotsordninga gjorde til at vi kunne gå meir aktivt ut å promotere henne. Det er flott å sjå at så mange hadde gode prosjekt dei vil setje i gang, seier plansjef Synnøve Stalheim.
Regional plan for klimaomstilling blei vedtatt i juni 2018, og tilskotsmidlane skal nyttast til å tiltak og prosjekt som bidreg til å følgje opp måla og tiltaka i Regional plan for klimaomstilling og bidra til at Sogn og Fjordane skal klimaomstille seg. I 2018 har det ikkje vore tematiske avgrensingar på midlane for å fange opp eit breitt spekter av søkarar. Slik vil det også vere i 2019.
Neste sjanse i januar
Det kom inn søknadar for 1,3 mill kr meir enn rammene til tilskotsordninga. I 2019 kjem det nye høve til å søkje midlar frå tilskotsordninga for klima- og miljøtiltak. Fyrste søknadsfrist er 15. januar 2019.
Fylkeskommunen har gjeve tilskot til følgjande prosjekt og tiltak i 2018:
| Søkar | Prosjekt |
| Naturvernforbundet | Vassdragstreff Aurland |
| Sogndal folkehøgskule | Seminar om solenergi |
| Nordfjordrådet | Energinettverk Nordfjord |
| Firda VGS | Klimakonferansen «Den grøne tråden» |
| SINTEF Energi | Grøn energi Stryn Sommarski |
| Gloppen kommune | El-sykkel i premie til europeisk mobilitetsveke i Gloppen |
| Jølster kommune | • Kartlegging av vernskog i Jølster og utarbeiding av rutine for skjøtselplan |
| • Profilering av interkommunal plan for klimaomstilling i Sunnfjord | |
| Stadlandet skule | Miljøveke 2019 |
| Årdal kommune | Rehabilitering av kunstgrasbana på Jotun Stadion – utan gummi-granulat |
| NFF Sogn og Fjordane | Rister ved inngangsparti for oppsamling av gummigranulat – 3 pilotanlegg. |
| Flora kommune | Reparasjonsstativ og luftpumpe ved Klatreparken |
| Vestlandsforsking | Kartlegging av erfaringar frå regionalt plan- og klimatilpassings- arbeid i nye Vestland fylke – finansiert saman med Hordaland fylkeskommune |
