Nordfjordingen i førtiåra tilstod å ha skaffa seg cannabisfrø og det han elles trengde av teknisk utstyr for å setje opp ein hasjplantasje i heimen. Dette skjedde to gonger. Han dyrka fleire avlingar og tilverka over to kilo marihuana. Sogn og Fjordane tingrett dømde mannen til eitt års ubetinga fengsel for tilverking, oppbevaring og bruk av hasj. Arkivfoto.

Hadde hasjplantasje

Ein nordfjording i førtiåra er funnen skuldig i å ha tilverka, oppbevart og brukt hasj.

No er han dømd til eitt års fengsel for to gonger å ha dyrka cannabisplantar heime.

F.T.: Jorid Lothe

Politimeisteren i Vest Politidistrikt hadde sikta mannen for fire brot på straffelova og legemiddellova. Det er snakk om fleire tilfelle av dyrking, tilverking, oppbevaring og bruk av hasj.

Cannabisplantasje i heimen
Mannen tilstod å ha skaffa seg frø og det han elles trengde av teknisk utstyr for å starte dyrking og produksjon av cannabis i bustaden sin. Dette var i tidsperioden mellom 2013 og 2015.

Retten fann det bevist at hasjplantasjen hadde gjeve minst fire avlingar. Politiet anslo at produksjonen gav minst to og ein halv kilo ferdig tørka plantemateriale (marihuana) totalt. Tiltalte hevda at den samla marihuanahausten var noko mindre, rundt to kilo. Dette fordi dei første avlingane gav noko mindre avkastning enn dei siste. Retten fann at dette spørsmålet berre var av mindre betydning med omsyn til straffespørsmålet.

Mange røyka hasj hos mannen
Nordfjordingen prøvde seg endå ein gong på hasjdyrking i heimen, denne gongen med ti plantar. Dette var i februar 2017. Han oppbevarte også 15 gram hasj.

Retten la vekt på at det i denne saka er snakk om omfattande og gjentakande produksjon av marihuana, og viser til Høgsterett sin praksis. Her går grensa for kva som skal reknast som grovt narkotikabrotsverk etter straffelova ved éin kilo ferdig tilverka hasj. Funna av ferdig tilverka cannabis låg godt over dette. Mannen forklarte at ei rekkje personar ved mange høve har brukt av den ferdige marihuanaen når dei har besøkt han. Han har også sjølv røykt hasj med jamne mellomrom i tidsrommet 2015 til 2017.

Nordfjordingen forklarte i retten at han ikkje selde hasj til folk, eller ønskte at stoffet skulle forlate huset hans. Det er ikkje ført bevis for sal eller anna omsetting av den produserte marihuanaen.

Rabatt for tilståing
Retten omtalar bevisa i saka som sterke. Ved vurderinga av straffeutmålinga for produksjon av cannabis er kapasiteten på plantasjen utgangspunktet. Sjølv om potensialet for avlingane ikkje vart oppnådd, var omfanget av hasjdyrkinga såpass omfattande og systematisk at retten meiner det var gjort forsøk på grovt narkobrotsverk. Retten brukar straffelova og tidlegare dommar i liknande saker i Høgsterett som grunnlag for vurderinga.

Mannen gav tilståing i retten 20. november i år, og retten finn at nordfjordingen har handla med forsett. Tilståingsrabbaten i denne saka vart sett til to månader, og han fekk også eit varetektsfrådrag på fem dagar. Etter ei samla vurdering sette retten straffa til eitt års fengsel utan vilkår.