Flåten er på plass på Jølstravatnet

Prosessen med å heve bilen som vart teken av raset på sørsida av Jølstravatnet 30. juli, er i gang.

- Måndag og tysdag denne veka vart brukte til å klargjere utstyret for å kunne utføre arbeidet, og til å rigge ein flåte slik at mannskapet får frakta utstyr ut på vatnet. Mellom anna løfteutstyr, varmehytte og ROV (undervassubåt) er med på flåten, skriv Vest politidistrikt i ei pressemelding.

Vidare heiter det: 

Onsdag 13. november: Flåten er frakta ut på vatnet til funnstaden av den antekne bilen og flåten blir no ankra fast. Mannskapet vil deretter sende ned ROV for å kunne undersøke sikta i vatnet og forholda på botnen. Den antekne bilen ligg på 170 meter djupne.

Planen vidare: Vidare vil ein forsøke å lausrive den antekne bilen ved hjelp av ein kompressor som er festa til ROV-en. Denne vil kunne suge vekk jordmassen kring gjenstanden. Dette er ein prosess som kan ta fleire dagar. Målet er å kunne få vekk nok jordmasse slik at ein kan feste løfteutstyret til gjenstanden.