Atle Nygård tildelt kulturprisen

Gloppen kommune sin kulturpris for 2018 er tildelt Atle Nygård. Han får prisen for sitt breie og allsidige engasjement for kulturlivet i kommunen.



I år er det 28. gong Gloppen kommune deler ut kulturprisen, og ifølgje retningslinjene skal prisen delast ut til personar, lag og organisasjonar som har vist vedvarande evne og vilje til å yte ein kulturinnsats utover det vanlege.

Ønskjer å få til noko
Atle Nygård er fødd i 1951, voks opp på Askøy utanfor Bergen og flytta til Gloppen i 1977. Frå første dag engasjerte han seg breitt og allsidig i kulturlivet i Gloppen.

– Opp gjennom åra har han hatt regien på fleire arrangement – aldri for eiga vinning eller for å framheve seg sjølv, men for å få til noko. Lista over prisvinnaren si deltaking og engasjement i kulturarbeid i Gloppen er lang, sa leiar i Multek-utvalet, Arnar Kvernevik, då han delte ut prisen i forkant av kommunestyremøtet onsdag.

Jeremiasfestivalen
Nygård er ein av dei som tok initiativet til Jeremiasfestivalen i 2011, ein folkemusikkfestival som no er inne i sin 7. sesong. Føremålet med festivalen er å kunne arrangere konsertar med topp nasjonale folkemusikkutøvarar som både er tradisjonelle, men også nyskapande og eksperimentelle i sin sjanger. I dag er Atle Nygård dagleg leiar for denne festivalen.

I 2014 tok prisvinnaren saman med Trygve Apalset initiativ til ein foredragsserie som dei kalla «Verda og vi».

– Målet var å gje dei som er interesserte i historie, politikk og samfunnsutvikling høve til å høyre på personar som har mykje kunnskap og som kan snakke om ulike tema, gjerne i fri dressur, fortalde Kvernevik, og la til at tiltaket har vore særs vellukka.

STIL-patriot
Nygård har vore ein aktiv musikar i Austrheim Musikklag, der han spelte kontrabass frå 1983 til 2007. Han har vore leiar i laget i nærare 15 år. Han var òg aktiv i planlegginga og finansieringa av laget sin 90-årsjubileumsturnè i 2007 som gjekk til alle kommunane i Sogn og Fjordane.

Nemnast må også innsatsen hans for Gloppen Musikktorg, eit samarbeidsorgan for folkemusikkmiljøet i Gloppen. Han var leiar i laget i 5-6 år.

– Prisvinnaren har vore aktiv i Sandane turn- og idrettslag sidan 1978. Fotballkarrieren var heller kortvarig, vert det sagt, men engasjementet for STIL har vart heilt fram til i dag, peika Multek-leiaren på.

Tidleg på 1990-talet stod Atle Nygård bak opprettinga av ei handikapgruppe i STIL, og han var med i styret i gruppa. Saman med Steinar Sægrov vart Roselaget etablert, eit lag som framleis er i sving. På same tid var han også STIL sin representant i arbeidet med å få i gang det fyrste rusfrie arrangementet på 16. mai. Nemnast må òg jobben han gjorde i samband med utbygging av Myklebustflata med å skaffe sponsorbidrag frå næringslivet.

– Ein grepa kar
Prisvinnaren er i dag pensjonist, men er stadig like oppteken av å utvikle kulturlivet i Gloppen til beste for innbyggjarane.

– Det er mange som set pris på Atle Nygård sitt arbeid. Han vert framheva som kreativ, påliteleg, ein humørspreiar og ualminneleg kjekk å samarbeide med. Han er kort og godt ein grepa kar, slo Arnar Kvernevik fast. Prisen består av ein diplom og ein sjekk på 15.000 kroner.