Svenskar "gillar" dansegalla
- Kan du forstå et ein danseglad svenske kan finne på slå seg ned i Bergen? Det finst ikkje ein einaste plass der vi kan gå ut å danse til levande musikk, smilte Bo Svensson og kona Monica Johansson, begge opphavleg frå Sverige.
Vi møtte dei to danseglade svenskane under dansegallaen på Skei. Dei har budd i Bergen i fem år og reiser rundt på det meste av slike festivalar både her til lands og i Sverige.
Godt konsept
Då vi snakka med dei søndag hadde dei fått med seg første kvelden, i tillegg til gratiskonserten søndag, og dei var så langt godt nøgde med dei hadde sett, og ikkje minst høyrt.
- Konseptet her er bra, artistane er gode, men teltet kunne kanskje vore litt breiare, var dommen frå Bo som såg fram til å høyre Contrazt om kvelden der, landsmann Lasse Sigfridsson som i år har 50-årsjubileum som dansebandartist, var gjestevokalist
Kultur
- Kva er grunnen til at dansebandmusikken er så uhorveleg populær i Sverige?, spurde vi.
- Det finst kolossalt mange danseglade menneske i Sverige og så er det ein del av kulturen vår, svarde dei to som ikkje hadde vore på Skei før, men såg ut til å kose seg.
- Det er fint her, men festivalen har ein stor feil og det er dansegolvet. Det var eit messegolv, ikkje dansegolv. Det var veldig vanskeleg å danse på, så det var ikkje bra, men elles var det supert, var dommen frå dei to svenskane som bur i bubil heile året, og som snart er klare for "Dansbandsveckan" i Malung for 16.gong. Bo er også delaktig i å arrangere festivalar.