Knut Buen kjem til Sandane

– Dette blir andre trinn i tretrinnsraketten som markerer Jeremiasfestivalen sitt femårsjubileum, seier dagleg leiar Atle Nygård.

Folkemusikkfestivalen Jeremiasfestivalen på Sandane er inne i sitt femte år. Jubileumsåret starta med Sommartreff i Karnilstunet 11. juni, held fram med konsert og dans i Frislidlada neste laurdag og blir avslutta med føredrag om juletradisjonar og -songar av Oddgeir Bruaset, song og dans i Aulaen 19. november.

– Ein strålande formidlar

– Knut Buen er ein nestor i norsk folkemusikk, men det er kanskje ikkje så mange i dette området som har sett og høyrt han live. No har ein sjansen, seier Atle Nygård.

Han legg ikkje skjul på at han gledar seg stort til det som skal skje i Frislidlada til helga:

– Vi har store forventningar til arrangementet. Buen er flink både musikalsk og verbalt, han er ein strålande formidlar. Dette må bli bra.

Har fått mange prisar

Knut Buen har gjort ein allsidig innsats innan folkemusikk og annan folkekultur, og som formidlar av denne. Han er spelemann, forfattar, komponist, kåsør, forleggar og impresario. Han tilhøyrer ei skikkeleg folkemusikkslekt, og vann sin første landskappleik allereie som 16-åring.

Buen er busett i Tuddal i Hjartdal kommune, Telemark. Der starta han kafeteria og kulturbygget Knutepunktet i 1994. Han driv òg Buen Kulturverkstad og Tuddal Amfi og Tonehall i sentrum av Tuddal.

Han blei utnemnd til Ridder 1. klasse av St. Olavs Orden i februar 1999, «for fortjeneste av norsk folkemusikk», og til statsstipendiat i 1989. Han har elles motteke ei rekkje prisar, mellom anna Telemark fylke sin kulturpris i 1986 og to Spellemannprisar.

Dans og kafé

Etter konserten med Knut Buen blir det dans til tonar av Eid Spelemannslag og Grannelaget.

– Eid Spelemannslag er verkeleg i skotet for tida. Dei spelar fengande og god dansemusikk og er ikkje framande for å synge attåt, reklamerer Nygård.

Jeremiasfestivalen har eit tett samarbeid med Nordfjord folkemuseum. I eldfast bygg blir det kaffi og noko å bite i mellom dansane.

– Kafeen blir open utover kvelden, slik at det blir mogleg å ta seg ein kaffi før ein går tilbake og dansar vidare, smiler den daglege leiaren.