Hilde Marie formidla nordlyset
– I kveld har eg sett det flottaste nordlys nokon sinne, og då eg kom inn her fekk eg høyre nordlyset i musikken, sa Silja Juklestad i møte med trompetisten Hilde Marie Holsen.
Jølstringen Hilde Marie Holsen tjuvstarta årets Jazz på Jølst med ein svært spesiell konsert i løa på Jølstraholmen. Der kombinerte ho trompet og elektronikk på ein måte som altså fekk Silja til å «høyre» nordlyset.
Blåsar i 20 år
Hilde Marie starta si karriere med kornett i Vassenden skulemusikk for tjue år sidan, og takka vere dirigentar som Gunnar Smaadal og Ragnvald Søgnesand, vart ho skubba vidare inn i eit løp som førde henne til musikkonservatoriet i Krisiansand , via musikklina på Firda,og overgang til trompet, og vidare til ei internasjonal karriere som i fjor resulterte i plateutgjeving og som også har ført henne til mange scener rundt om i Europa. Sist handla det om ein turne i Italia for ein månad sidan og i november blir det ti dagar i Nederland.
Elektronikk som instrument
Musikken til Hilde Marie Handlar om å spele trompet akkompagnert av elektroniske lydar, laga av trompeten, lagra på lydfiler og seinare omarbeidde og tilpassa.
– Elektronikken er mitt andre instrument og noko eg starta med for fem år sidan. Den er på ein måte ei utviding av lydpotensialet i trompeten, forklarte Hilde Marie om lydane der berre fantasien sette grenser for kva som kunne høyrast. Men vindsus og dur av bølgjer var i alle fall ting som kunne høyrast og som vekselvis fungerte enten som første eller andre instrument.
