Home   >   Nyhende   >   I helga glitrar himmelen – om du får sjå den

Eldkule frå ein annan meteorsverm (Leonidene) i 2009. (Foto: Navicore/Wikipedia)

I helga glitrar himmelen – om du får sjå den

Det er no klart for ein av dei kraftigaste meteorsvermane for året når Jorda i desse dagar passerer gjennom eit støvband frå kometen Swift-Tuttle.

Dei første stjerneskota frå svermen er alt observert, men toppunktet er venta natt til 12. august og 13. august. Perseidene er difor den einaste svermen vi her i Norge kan oppleve under sommarlege tilhøve.

Meteorforskarane har rekna ut at Jorda i år vil passere støvbandet etter kometen laurdag 12. August kl. 19 norsk tid. Det tyder at den største aktiviteten kan ventast natt til søndag, men også natt til laurdag vil det vere høg aktivitet.

Normalt kan vi sjå opptil 80-100 stjerneskot i timen under Perseidene, men i år kjem månen til å gjere himmelen så pass lys at dei svakaste meteorane ikkje vert synlege. Trass det er svermen så rik på lyssterke stjerneskot at det likevel skal vere mogleg å sjå 40-50 meteorar i timen medan det står på.

I Sør-Norge kan fenomenet observerast frå himmelen vert mørk i 23–23.30-tida til det så vidt byrjar lysne av dag.