Har imponert på internasjonal talentleir

Jon Rolf Skamo Hope (Hyen IL/NTG Geilo ) har imponert under internasjonal talentsamling for unge langrennsløparar denne veka.

Samlinga i Oslo, PÅ Hamar og på Sjusjøen er arrangert av Norges Skiforbund i samarbeid med Statoil Morgendagens Helter. Ho har som føremål å utvikle langrennssporten internasjonalt.

Lære av kvarandre

Målet er at dei deltakande nasjonane skal lære av kvarandre og gjere kvarandre betre.

– Talentutvikling handlar mellom anna om læring. På Statoil sin talentleir i langrenn ønskjer vi å inspirere unge talent til å oppretthalde innsatsen, gløden og læringsfokuset vidare. Vi er imponerte over Jon sine prestasjonar på samlinga, seier marknadsdirektør i Statoil, Karen Onsager Keiserud.

Kompetansedeling

På samlinga deltek 76 talent fødde i 1997 og 1998 frå ti ulike nasjonar. Frå Noreg stiller Morgendagens Helter Juniorlandslaget, samt tre utvalde impulsløparar.

– Det er flott at Noreg kan bidra med å sikre talentutvikling på tvers av landegrenser. Slik kan vi sikre morgondagens langrennsløparar, seier Onsager Keiserud.

Kan samanlikne

På programmet for leiren står treningsøkter som myrløp, fjelltur og rulleskiløp, samt fysiske testar for både styrke, spenst og hurtigheit, mellom desse den kjende Frognersetertesten.

Leiren er dermed eit unikt høve for unge langrennstalent til å få samanlikna prestasjonane sine med nokre av dei beste langrennsutøvarane i verda på nivået sitt, i eit breitt spekter av aktivitetar.

Inspirerande

I tillegg til trenarar frå alle deltakernasjonar, mellom dei den nyvalde trenaren for det norske juniorlandslaget, Geir Endre Rogn, er også Astrid Uhrenholdt Jacobsen og Sondre Turvoll Fossli til stades på leiren.

Dei to langrennsheltane er begge ambassadørar for talentutviklingsprogrammet Morgendagens Helter, og bidreg både som trenarar og mentorar for dei unge utøvarane.