– Vi vil oppmode folk om å gje mest mogleg, for Røde Kors gjer ein viktig jobb. Om barnehagar og skular kan engasjere seg, er det flott, seier Merete Mindresunde i Røde Kors og varaordførar Magni Aa Berge.

Håpar folk er rause søndag

Aadne Gloppestad aadne@firdatidend.no

Publisert: 20.10.2016 08:00 Sist oppdatert: 10:00

Komande søndag er det klart for ein ny innsamlingsaksjon, og alle husstandar vil få besøk av ein bøsseberar. Årets TV-aksjon går til Røde Kors.

NRK sin TV-aksjon er vorte gjennomført kvar haust sidan 1974. Målt i deltakartal og innsamla midlar per innbyggjar er dette den største innsamlingsaksjonen i verda. Det er ein nasjonal dugnad der alle deltek.

– Stort engasjement

Varaordførar Magni Aa Berge er leiar for den lokale komitéen i Gloppen kommune. I formannskapet måndag minte ho om aksjonen og bad politikarane vere gode ambassadørar for denne. Ho meinte det var viktig at kommunen sine folkevalde framsnakka TV-aksjonen.

– Den lokale komitéen samarbeider med Gloppen Røde Kors om gjennomføringa av årets aksjon, og vi har godt med bøsseberarar. Røde Kors har gjort ein svært god jobb med å skaffe bøsseberarar. Fleire av flyktningguidane i kommunen stiller opp og går i lag med dei som dei er guidar for. Det er flott. Eg tykkjer det er godt at TV-aksjonen går til ein organisasjon med lokal forankring. Då blir engasjementet stort, seier Magni Aa Berge.

Ho håpar både privatpersonar og næringslivet vil bidra.

– TV-aksjonen skal redde liv og gje omfattande helsehjelp til nokon av dei mest sårbare i verda – menneske ramma av krig og konflikt. Krigshandlingar skjer kanskje langt unna oss, men dagleg får vi bilete servert gjennom nyhenda på fjernsynet. Gjennom TV-aksjonen skal meir enn to millionar menneske få livsviktig hjelp, understrekar ho.