Furorestipend til Jølstring
Den 28 år gamle musikaren Hilde Marie Holsen frå Jølster har fått Sparebankstiftinga sitt Furorestipend for 2017. Stipendet er på 50.000 kroner
Holsen var i fjor ein av artistane under "Jazz på Jølst" då ho "tjuvstarta" festivalen med konsert på "løa" Jølstraholmen.
Blåsar i 20 år
Hilde Marie starta si karriere med kornett i Vassenden skulemusikk for tjue år sidan, og takka vere dirigentar som Gunnar Smaadal og Ragnvald Søgnesand, vart ho skubba vidare inn i eit løp som førde henne til musikkonservatoriet i Kristiansand, via musikklina på Firda. Undervegs vart det overgang til trompet, og etter kvart ei internasjonal karriere som i 2015 resulterte i plateutgjeving og som også har ført henne til mange scener rundt om i Europa.
Hilde Marie er no fulltids musikar, komponist og dirigent og har truleg ei strålande karriere framfor seg.