Arbeidsløysa går ned

Sogn og Fjordane lågast i landet.


I april er det 15 færre arbeidslause i Sogn og Fjordane enn i april i fjor.
– Sjølv om reduksjonen er liten, er det ei positivt utvikling. Sist arbeidsløysa gjekk ned var i mai i fjor, seier direktør for NAV Sogn og Fjordane, Tore Thorsnes.

– Vi har god tilgang av ledige stillingar og situasjonen på arbeidsmarknaden i fylket er meir positiv enn på lenge. Industri og reiseliv nyt godt av låg kronekurs og aktiviteten innan bygg og anlegg er aukande. Vi ser også at bedrifter som har levert til oljeindustrien er flinke til å omstille seg til nye marknadsområde. Oljekrisa har såleis i liten grad påverka statistikkane våre så langt i 2016, seier Thorsnes.

Lågast i landet
Ved utgangen av april er det 1204 personar i Sogn og Fjordane heilt utan arbeid. Dette svarar til 2,1 prosent av arbeidsstyrken og er lågast i landet saman med Oppland.

På landsnivå har arbeidsløysa auka med 5835 personar (7 prosent) frå april i fjor. Det er no 85 471 heilt ledige, tilsvarande 3,1 prosent av arbeidsstyrken. Vestlandsfylka, med unnatak av Sogn og Fjordane, og Agder-fylka står for det meste av auken.

Store forskjellar mellom kommunane
12 kommunar i Sogn og Fjordane har reduksjon i arbeidsløysa i april. Størst reduksjon har Vågsøy med 43 færre ledige enn på same tid i fjor og Stryn med 34 færre ledige. Lågast arbeidsløyse finn vi i Leikanger med 0,6 prosent, Solund med 0,7 prosent og i Hornindal og Gloppen, begge med 0,8 prosent. Selje med 5,3 prosent, Hyllestad med 4,4 prosent og Flora med 4,3 prosent, har høgast arbeidsløyse. Flora og Hyllestad er kommunane i fylket der høge arbeidsløysetal er direkte knytt til oljekrisa.

Stabilt i industri, bygg og anlegg
Talet på heilt ledige innan industri og bygg og anlegg er uendra frå april i fjor. Størst nedgang i arbeidsløysa er det innan kontorarbeid og butikk- og salsarbeid, som har høvesvis 11 og 22 færre ledige enn i april i fjor. Innan ingeniør- og ikt-fag er det ein auke på 15 personar, mens reiseliv og transport har ein auke på 14 (det meste av dette er kokkar og sjøfolk i tilknyting til oljeindustrien).

I april er det 209 heilt permitterte i Sogn og Fjordane, 5 fleire enn i same månad i fjor. 109 av dei permitterte kjem frå industri, av dette 84 frå fiskeindustri, mens 55 kjem frå bygg og anlegg.

Positivt for innvandrarar
Talet på heilt ledige innvandrarar frå ikkje-vestlege land er redusert med 49 personar frå april i fjor. Dette svarar til ein reduksjon på 19 prosent. Reduksjonen er størst blant innvandrar som jobbar i butikk, bygg og anlegg og helse, pleie og omsorg.
– Innvandrarar er ofte mellom dei første som må gå når arbeidsmarknaden forverrar seg, så det er positivt at mange i denne gruppa no kjem i jobb att, seier Thorsnes.

Fleire ledige stillingar
Stillingsmarknaden i Sogn og Fjordane har utvikla seg positivt i 2016. I april har talet på ledige stillingar auka med 21 prosent, samanlikna med april i fjor. Auken er størst innan bygg og anlegg og butikk- og salsarbeid.
– Det er ein aukande tendens til at arbeidsgjevarar melder ledige stillingar direkte til NAV, eller registrerar dei sjølv på nav.no. Dette gir oss betre moglegheit til å kunne bruke våre virkemiddel for å hjelpe både arbeidsgjevarar og arbeidssøkjarar, seier Thorsnes.