Ankar ikkje dommen

Dommen mot glopparen på eitt år og åtte månader fengselsstraff for nedlasting og distribusjon av barnepornografiske bilete og videofilmar vert ikkje anka.

Dommen fall femte januar, og ankefristen gjekk ut to veker seinare. Aktor la som kjent ned påstand om eitt år og seks månader fengsel, medan Sogn og Fjordane tingrett skjerpa straffa med to månader.

Lang tid og stor belastning

– Det vert inga anke i saka, seier tiltalte sin advokat, Geir Michael Jesinsky.

Det er ei avgjerd tiltalte han har teke i samråd med sine pårørande.

– Han er usamd i dommen, men energien til å gå vidare er ikkje til stades, seier Jesinsky og viser til at saka har teke fleire år og vore ei stor påkjenning både for tiltalte og for familien.

Ei ny runde i rettssalen var derfor ikkje ønskjeleg.

– Det var ei innstilling klienten min hadde også før saka kom opp november/desember, seier Geir Michael Jesinsky.